喺沙田小瀝源嘅新界鄉議局綜合大樓已動工年幾，但仲有四千萬元工程款項未有着落。上禮拜西貢北約鄉事委員會專登搞咗個籌款餐會，揼出席嘅鄉紳心口，成績都唔錯，有二百五十幾萬元進帳。
嗰晚擺咗五十二圍，淨係主家席都坐咗二十六人，每人捐兩萬蚊買枱，就已經進帳五十幾萬。同場有熱心鄉紳捐出大批禮物搞氣氛，畀大家抽獎助興，炒熱氣氛。而晚會另一高潮迭起嘅籌款環節，就係捐錢點唱嘞，在座嘅鄉議局主席劉皇發講明自己唔唱，但就帶頭夾五萬蚊點名副主席張學明高歌一曲，令現場High到爆！
張學明平時唔唱歌，上台時都有啲怕醜，但為咗善款惟有硬住頭皮上，唱咗十幾年前嘅《新鴛鴦蝴蝶夢》。張學明左手揸咪，右手揸住疊金牛，好搞笑咁為錢賣唱，但又真係有啲跟唔上節拍，台下眾人即刻大打拍子助陣，終於喺大家同心協力下，完成咗「處男騷」。