行政會議成員Laura查史美倫早前喺電視節目訪問時話有孫萬事足，依家成日同老公查懋成爭住抱個孫，幸福滿瀉。尋日畀記者問起關於佢個孫仔嘅事，Laura表現即刻同普通家庭主婦冇分別，笑容甜到漏，透露個孫嘅英文名叫Owen，同英超球星奧雲一樣，今年兩歲。雖然只係寥寥數語，但從佢嘅輕柔語氣同燦爛笑容，已經睇得出佢係幾咁疼錫呢個孫仔啦。
奧雲仔只有兩歲，但其實佢未識講嘢前已經上過報紙㗎喇。舊年七月一號，Laura同查懋成現身沙田馬場，畀我哋影到查生心口掛住一個獨一無二嘅圓形襟章，上面印住一幅趣致BB仔嘅相，嗰個就係奧雲仔嘞。當時奧雲仔十五個月大，塊面肥嘟嘟，極之可愛，唔怪得咁得Laura寵愛啦。
