經濟動力嘅立法會議員Andrew梁君彥（圓圖）身兼職業訓練局主席，經常為旗下中華廚藝學院諗計度橋，為咗貼近飲食潮流脈搏，佢鍾意四出搵好嘢食，最近佢就極力推介灣仔蘭杜街間「蝦麵店」。蝦麵店專做馬來西亞檳城菜，Andrew最愛係「福建滷麵」，佢大讚湯底夠濃郁，海蝦又新鮮，令人回味無窮，每碗只盛惠三十五蚊咋！
蝦麵店廚師丁先生話，佢哋個湯底之所以咁受歡迎，皆因用咗鮮蝦殼熬湯底，飲落分外鮮甜，一日要用上十幾斤海蝦，仲要請兩名員工專責剝蝦殼，一啲都唔簡單。蝦麵店麵食有平有貴，湯底可選擇辣同唔辣，以辣湯底較受歡迎。
蝦麵店有好多名人捧場客，政界除咗Andrew外，行政會議成員劉江華都係座上客，藝人就有鍾楚紅、周汶錡、黃子華等，連飲食界同行、鏞記酒家老闆甘健成都有去試過。