公文袋唔聲唔聲擺人上枱

早幾日，民協前主席KK馮檢基就牙痛咁聲話自從立法會內爆出「冇家教」事件，黨內多咗好多聲音要求佢哋諗清楚係咪為同屬九龍西嘅黃毓民拉票。KK指民協本身對五區總辭都好有保留，有人認為唔應該支持，但亦有人覺得應該以大局為重，先保住泛民喺議會內嘅否決權，傾向為五區總辭站台。但依家反對為五區總辭站台嘅聲音愈嚟愈強烈，搞到民協都要成立小組開會，仔細討論吓將來佢哋喺補選嘅定位，費事順得哥情失嫂意。

雖然KK大嘆泛民「搵着佢嚟搞」，但相信呢場「冇家教」風波絕對幫咗佢一把。事關公文袋最初決定參與五區總辭，問都冇問過民協就好順手咁擺咗KK上枱，搞到民協好不滿，認為不被尊重，唔多唔少已經冇心機幫手站台，不過礙於如果最後泛民喺補選選輸，可能反畀社民連大聲夾惡鬧民協係民主罪人，所以先去考慮到底係咪幫手。「冇家教」事件一出，無論輿論定民心，都唔支持一啲只係識鬧人嘅議員，呢個時候民協就大條道理要尊重民意，唔使驚畀人無理攻擊。

再講，喺前年立法會選舉，社民連空降九龍西已搶走民協唔少票，令民協九龍西泛民得票第一嘅地位不保。民協內部唔少人都擔心，如果補選幫社民連站台，可能有啲票會一去不復返，對將來嘅選戰不利。依家民協大條道理唔幫手，分分鐘淨係擔櫈仔睇戲就可以。

勢估唔到呢次爆粗「冇家教」事件，竟然畀KK喺五區總辭嘅魔爪下搵到逃生門，可以甩身。