小白觀點：承蒙老懵董德政關照
近排開口埋口「80後」，見到一大班唔大唔細嘅青年怒火街頭，連當局見到都有啲腳軟，實在唔講得笑！
其實「80後」就係承蒙老懵董德政關照嘅一代，呢班小朋友，小白老弟識得唔少，有個叻仔當年成績唔曳，好衰唔衰蠢鈍一時，響應當局號召搞IT上山下鄉。發生咗乜嘢事都唔使多講啦，依家近三十歲仔，IT人喎，一日做足十幾個鐘，設計、砌網、程式一腳踢，仲要日日畀老闆炳、畀「孖屐亭」捽、畀老竇話廢、畀女朋友笑窮。
小白都無話可說，只可以同佢講歷史係公道嘅，因為「寧為雞口，莫為80後」呢句說話，一定會成為後世引以為戒嘅至理名言。
網友觀點...X）...
[ 大 白 ]
啲「80後」知少少又鍾意學人搞政治，信錯班激進搞事之徒，分分鐘成為香港恐怖分子！！
[ m m ]
佢哋真係身在福中不知福，唔檢討吓自己有乜問題先，一味只係抱怨！
[ 紅小兵 ]
我都係「80後」，依家等運到，冇收入，好彩仲可以上街抗爭唔使使錢啫。
[ 張C9 ]
再係咁落去都唔知點收科，仲叫人生多幾個，呢個煲呔曾真係好帶挈！
網址：www.sunsiupak.blogspot.com
阿豪觀點：政府奸計想轉移視線
究竟「80後」係乜嘢？據聞政府中有人話「80後」係「計時炸彈」，結果梗係犯晒眾怒啦！
其實諗清楚啲，就知道用年代嚟將人劃分，係好唔科學㗎啦！更加重要嘅係，再咁樣落去，只會愈嚟愈多爭拗。可能呢樣就係中國人嘅劣根性，明明大家都係中國人，硬係要有省籍情結，廣東人有廣東人埋堆，上海人有上海人堆埋，好嘞，到大家都係廣東人，就要細分你鄉下係東莞定係台山，咁點會有進步呢？
千祈唔好中政府計添呀，大家掛住標籤「80後」，跟住又使唔使標籤「70後」呢？咁搞法，大家咪唔記得政府倒行逆施？係囉，大家都係「10」前，握手做個好朋友啦！
網友觀點...X）...
[ 單車男 ]
「80後」應該係指講得而唔捱得嘅理想主義者，欠缺咗啲拚搏精神。
[ 匿 名 ]
立法會班演技派議員，成事不足，搞事有餘！若果「80後」有樣學樣，香港就會衰上加衰！！
[ 阿 歡 ]
我見有啲「80後」都好似有理想咁，其實佢哋可以匿埋喺屋企乜都唔理……
[ 蠻 牛 ]
點解要標籤呢？每個年代都有啲人叻有啲人廢，有啲人有理想有啲人激進㗎啦！
網址：www.lukchiho.blogspot.com