鏹彈狂徒都夠晒賤格，專門揀人多嘅地方埋手，搞完旺角搞銅鑼灣，然後又搞油麻地，總共已經有一百三十幾人中招。鏹彈狂徒直情係人民公敵，鏹魔不滅，香港不寧。

當局例牌賊過興兵，曾蔭權對狂徒嘅行為表示「氣憤」，仲話警方已經懸紅緝兇，呼籲市民協助警方。

政府可能以為有錢使得鬼推磨，懸紅就可以制服狂徒。可惜由舊年到依家，懸紅獎金不斷加碼，但鏹水彈爆完一單又一單，變態狂徒就連影都未見。

除咗懸紅之外，警方最叻就係裝天眼，邊度出咗事就去邊度裝。喂，狂徒會唔會咁笨，次次喺同一個地方作案呀？其實就算狂徒再返嚟，都好難捉到佢。事關攝錄系統盲點多多，錄影質素又麻麻，兇徒個樣好難拍攝清楚，點破案呀？難為警方仲死撐，話無論天眼清晰度夠唔夠，對調查都會有幫助喎。真係畀佢激到氣咳。

講真，本港樓宇保安實在係千瘡百孔，至少有數百座大廈不設防，冇裝鐵閘，亦冇閉路電視，閒雜人等可以自由出入，變態狂徒大有可乘之機。政府唔加強樓宇保安，只喺度頭痛醫頭，腳痛醫腳，咪盞嘥氣。叮！

鏹魔神出鬼沒，警方束手無策，市民對政府已經唔抱好大希望。油尖旺區議會尋日開會，一眾議員狂炳警方無能，批評天眼「白內障」、無用及裝假狗，又踢爆有駐守大廈天台嘅警員疑似打機，居民、商戶及區議員仲推出自救措施，包括籌集五十萬元喺區內高危大廈天台安裝有警報器嘅閘門，仲會喺大廈地下入口安裝閉路電視，令閒雜人等「滴水不進」。

市民知道，一定要守望相助，先至可以擊退鏹魔。嗱，廟街出事嗰日，街坊同商戶齊齊出動，有人幫傷者沖洗，有人報警叫白車，仲有人自動自覺封鎖大廈出口，如果當時反應再快啲，狂徒可能就走唔甩。

民意不可侮，市民都行動起嚟，政府如果因勢利導，警民合作，何愁捉唔到鏹魔。可惜皇帝唔急太監急，咪睇曾蔭權鬧狂徒嗰陣嬲爆爆，但係講完就冇其事。日前仲帶埋影相架生去新界睇雀，玩得不知幾開心，話之你鏹彈滿天飛啦。

之不過，懲治罪惡，當局責無旁貸。如果政府仲係咁唔嗲唔吊，任由狂徒作惡多端，香港仲會係購物天堂咩？係鏹彈中心至真。叮！