中大校長「膠樽義」劉遵義宣布再做老襯，前日迎娶會計師麥嘉軒。膠樽義結婚「先斬後奏」，前日帶太太出席中大球賽時口口聲聲話如果婚期定咗會公布，原來兩人就喺當日註冊，尋日發聲明感謝各界祝福。
六十五歲嘅膠樽義同細佢十五年嘅麥嘉軒撻着，全城嘩然，原來膠樽義呢次嚟真，前日唔聲唔聲抱得美人歸，註冊儀式冚得好密，相信只有雙方至親觀禮。兩人當日冇擺酒亦冇度蜜月，攜手走去中大參加校長盃球賽，膠樽義當日介紹麥嘉軒時仍以未婚妻相稱，嘉軒不但冇詐型，樂做跟得夫人黐實老公。
劉麥完婚，唔少老友紛紛發短訊恭賀，膠樽義好客氣，叫大家唔使送禮，話過咗婚期就唔收禮，否則唔吉利喎！
