近年嚟中華廠商聯合會銳意搞年輕化，扶植新一代上位，全國政協委員盧文端女婿Jimmy吳永嘉（圖）就啱啱新紮成為副會長。佢早前以政治事務委員會屬下「專業人士小組」召集人身份喺馬車會所設宴，邀請律師會會長王桂壎同稅務學會前會長龔永德分享珠三角發展機遇。
講起戴錶心得，佢即時遞出右手展示伯爵名錶。呢款錶機芯超薄不在話下，設計簡潔高雅，錶身背面仲刻上「137/150」編號，即係一百五十隻限量錶入面嘅第一百三十七隻，身價不言而喻。
唔講唔知，隻錶原來係外父盧文端幾年前送贈。Jimmy話外父喜愛收藏手錶，隻錶矜貴之處係全球發行量寥寥可數，分分鐘有錢都買唔到，所以佢一於日日戴住返工，以示尊重外父。
