早前都講過工聯會新增唔少白領工會，好似其轄下嘅金融、銀行、保險等工會喺嚟緊嘅星期六會同深圳金融業界人士喺東莞打高爾夫球邀請賽，但工聯會會長、當日負責主禮嘅鄭耀棠唔怕醜咁建議球賽應加設「擊球不中獎」，等佢呢啲唔識打嘅都有得攞獎喎！
棠哥話首次接觸高球係喺四年前嘅工聯會活動，嗰陣佢又係負責主禮，但係佢就連開球都未識。好在佢平時睇電視都有睇吓高球節目，仲話自己擺姿勢仲好睇過「老虎仔」活士。點知原來佢係有姿勢、冇實際，第一桿打落去，個球都唔知去咗邊，打第二桿個球又跌番落自己腳邊，第三桿先打到出去。唔知係咪嚇怕咗，之後佢都冇再點學打高球喇。
當日嘅高球比賽，政務司司長唐唐、財經事務及庫務局局長陳家強同中聯辦官員都會去主禮。