幾經辛苦，立法會先至湊夠七名議員組成調查委員會，徹查白鴿黨議員甘乃威涉嫌求愛不遂怒炒女助理事件，但咁都唔代表甘威嘅議席凍過水，因為委員會大部分成員其實都無心戀戰。委員會副主席陳健波尋日就率先表態，表明反對引用特權法傳召女事主作供，又認為調查難以喺「有被告、冇原告」嘅情況下繼續，預早為甘威調查草草收場鋪定下台階。
其實，委員會主席梁劉柔芬同廠商會林大輝，私底下亦同人講過希望今次調查盡早結束，慳番啲時間同精力處理其他事。真係想查落去嘅其實只得白鴿黨嘅選舉死敵建仔劉江華，同埋講過「眼神都可以構成性騷擾」嘅專業會議梁美芬，估計單憑佢哋兩個，好難將調查搞大同拖長。
陳健波又話秘書處已搵咗十幾個開會日期畀佢哋揀，可望喺今個月之內召開首次會議，估計會先傾吓調查嘅具體程序同證人名單。佢個人認為女事主作為懷疑性騷擾事件嘅受害人，如果佢堅拒自願作供，議員冇理由引用特權法逼佢，仲話如果女事主真係唔肯合作，估計佢哋只須開幾次會就可鳴金收兵，向立法會提交調查報告，將個波踢番畀全體議員，決定係咪就咁放生甘威。