好多人都話發展局局長林鄭月娥「好打得」，但有時唔好淨係睇一面，查實鐵娘子背後都有一顆少女心。尋日林鄭幫貿發局搞嘅玩具展主持開幕禮，佢寓工作於娛樂，睇啲玩具模型睇到入晒神，仲似乎對美國嘅漫畫英雄人物好有興趣添！
林鄭一入展廳就畀一個同真人一樣高嘅模型吸引住，但佢唔知係乜水？好好奇咁想伸手摸吓佢，而展商都連忙向林鄭介紹一番，話佢知呢個係「鐵甲奇俠」嚟。
心情未平復好，林鄭一轉身就見到個「熟人」，係由外籍人士扮演嘅蝙蝠俠！林鄭當堂兩眼發光，仲主動同佢握手添。但唔知嗰位外籍人士係咪入戲得滯，為保持住Batman cool到爆嘅形象，對住林鄭唧都唔笑。即使佢哋一齊合照，Batman依然冇畀林鄭四萬咁口嘅笑容打動到，嘴角堅持彎都唔彎吓。林鄭為咗博佢一笑，就爆咗句「He doesn't smile（佢唔笑喎）」！可惜Batman依然故我，搞到林鄭鬼死咁尷尬，非常冇癮。