尋日周一鑊出席立法會衞生事務委員會會議，有議員就開聲話醫護人員係高危一族，政府呼籲佢哋打針先，但原來打針嘅醫護人士人數低到不得了，就連醫學會前會長蔡堅都唔打住，而立法會醫學界嘅代表都唔肯打。咁講，擺明係衝住「怪醫」梁家騮啦！

既然畀人點咗名，本身係威爾斯親王醫院外科醫生嘅怪醫即時呼冤，話唔打針純粹因為唔覺得自己係高危一族喎！唔係呀？佢係醫管局轄下公立醫院嘅醫生，咁都唔算？

怪醫話若果豬流感針一次過打完就可以終身受用就話啫，但流感疫苗係要年年都打嘅，如果要年年都走去畀人拮一針，好痛㗎嘛，所以佢之前都冇打季節性流感疫苗。

帶頭唔打針 議員勢跟風

怪醫竟然當住周一鑊面講呢番話，唔單止係一盆冷水淋向周一鑊，簡直就係拆埋佢台。事關周一鑊嗰頭啱啱至講醫護人員打針唔止為咗保障自己，仲係要避免將病毒傳染畀病人。怪醫唔覺得自己係高危人士，唔知言下之意係咪做咗議員後，都好少返醫院睇病人呢？

有議員話，怪醫變咗立法會醫療顧問，好多議員都走去請教佢一啲奇難雜症，而怪醫亦樂得畀意見，有時有啲同僚問起某啲補品同補充劑效用如何，怪醫幾乎全部話冇用，而啲同僚都好聽佢支笛㗎。依家怪醫竟然對豬流感針潑晒冷水，咁咪即係教唆啲議員唔打針囉？

唔認係高危人士嘅仲有工程界代表何鍾泰，佢已屆「從心所欲之年」，都話唔打住，佢話季節性流感疫苗就一早打咗，但豬流感支針咁新，都係睇定啲先，仲話自己年齡上雖然算高危人士，但身體狀態仲有排都未係喎。