小白觀點:警方懶巡高危地區靠害
鏹魔周圍搵地方掟鏹彈,今次終於輪都輪到廟街,有外國旅客中咗頭彩添,真係好帶挈嘞。
小白老弟經常帶外國嚟嘅朋友去廟街食避風塘炒蟹,上星期至同個台灣嚟嘅老友大擦一餐,佢食到舔舔脷,不知幾開心。但今次醜事即刻傳千里,呢位台客即刻打個MSN來,話認出就係上次佢坐嗰個位,大鬧我帶佢去戰區玩命,差啲連Friend都冇得做呀。
鏹魔次次犯案模式都係大同小異,好似話專揀周末人多日子行事,附近一定要有容易出入嘅舊唐樓,廟街肯定係高危之地,唔明點解當局唔做足準備加強警力。再任得鏹魔橫行,起多十條高鐵都冇用啦,搵鬼嚟咩?
網友觀點……
小黑
天眼冇料到,不如裝埋天幕啦,笨!
黎天王
大家估吓下次邊度中招,我估都輪到尖沙咀區喇!
曹探長
莫非黎天王就係鏹彈狂徒?
Gloria Tam
都唔知邊個咁冇人性,掟鏹彈落街,搵多啲警察巡樓就啱。
網址:www.sunsiupak.blogspot.com
阿豪觀點:「鏹彈遊」好過「綁架團」
又有一宗鏹水彈事件!今次係喺遊人眾多嘅廟街。嘩,都已經數唔清呢宗係第幾宗同類案件囉……真係下次又唔知輪到邊區咯……
睇番廟街鏹水彈事件嘅報道,有美國遊客接受訪問,話佢哋嗰邊傳媒都有報道香港嘅鏹水狂徒,不少人都好心勸佢千萬要小心。
吖,咁就奇嘞,點解明知山有虎,偏向虎山行呢?原來有啲人就係咁奇怪,鍾意冒險。好似中東國家也門同沙特阿拉伯咁,原來當地有旅行社推出「行程」,等旅客可以畀「綁匪」綁架三日,然後「逃出生天」。計我話,香港搞「鏹彈遊」仲吸引啦,起碼貨真價實,旅客中招即時皮開肉綻,比扮晒嘢嘅「綁架團」堅好多!
網友觀點……
肚皮大過波
喪心病狂的瘋子真係避無可避……
匿名
面對狂徒冇晒符,警方究竟搞緊乜?你教市民點放心!死咗都唔知為乜?
口水男
政府應撥款大量招聘「食蕉」,在各區天台二十四小時肉眼監視,阻嚇力一定大過啲天眼!
蟻民
這個懦夫狂徒,有種就應該去煲呔門口掟,唔好搞啲無辜小市民!
網址:www.lukchiho.blogspot.com