咦！唔係話當局一早已安裝天眼緝兇嘅咩？點解鏹魔仲係咁猖狂呢？鬼咩，天眼係假，盲眼就真，根據港府跨部門「專家會診」結果，當局裝嘅天眼患咗白內障，既睇唔晒，又睇唔清，唔好話影唔到鏹魔，就算影到都冇用啦！

鏹水狂魔肆虐香港一年多，到依家警方連條毛都摷唔到，認真失敗。舊年年中當局係威係勢喺旺角裝咗八部天眼攝錄系統，最近又搵埋民政事務總署、警方同機電署一齊檢討成效，跨部門工作小組發現，原來攝錄系統有好多盲點，錄影質素又差，完全係得物無所用，根本阻止唔到鏹水彈空襲重演。照咁睇，裝天眼嘅一百七十萬公帑都係凍過水咯。

先聽警方點講，原來天眼成日發雞盲，如果光線唔夠，拍到嘅影像就會矇查查。唉，天眼拍唔到兇徒個樣，警方又點拉人，點破案呀？

機電署檢討結果仲搞笑，原來佢哋希望啲影像唔好太清晰，朦朦朧朧就啱晒。點解？原來係為咗「保障私隱」喎。喂，大佬呀，究竟係保障市民私隱定係兇徒私隱先？

睇唔清都未算，至弊係好多地方連睇都睇唔到，咁先至好笑。機電署話喎，天眼裝喺固定位置，只能覆蓋某個範圍嘅全景，加上附近招牌林立，樓宇有高有低，遮住咗鏡頭，留低唔少盲點。即係話，如果鏹魔搵呢啲死角位置犯案，當局完全冇符。你話喇，咁廢嘅天眼，同患白內障或者青光眼有乜分別？

仲有更離奇㗎，機電署又發現，附近啲大型燈箱晚間發出嘅強光，會令天眼拍攝範圍光源差異增大，影響影像質素。咁就奇嘞，警方話光線唔夠拍唔清，機電署又話光過頭唔掂，呢啲系統買來把鬼咩！

叮！天眼變成空擺設，裝咗等於冇裝，發揮唔到緝兇作用，係因為當局對鏹水彈威脅根本冇足夠重視。每次出事之後，煲呔曾例牌扮晒嘢去現場做吓「視察騷」，警方亦會循例增加懸紅金額，但到頭來咪又係得個吉。

鏹魔逍遙法外，高空擲物愈來愈離譜，當局獨沽一味，畀人嘈得犀利就話會裝天眼，點知天眼不過係「裝假狗」。計太一叮話齋，裝天眼變咗天冇眼，信港府不如靠自己，市民出入最緊要行騎樓底，戴鋼盔呀！