美食同身形不能兩全，飲食界立法會議員「肥仔張」張宇人嘅選擇係要身形。尋日九龍城美食節開幕，肥仔張都有撐場，全場三十二檔美食攤檔，佢一邊行一邊美言，但就好忍口，最後只係食咗兩粒魚蛋同一杯奶茶就離開。
肥仔張天生為食，美食節嘅檔主又係佢個界別，所以肥仔張尋日逐檔「拜票」，檔檔都去打招呼，其中一檔仲有佢最鍾意食嘅甜品杧果黑糯米，唔好以為佢眼看口就動，如果唔係有其中一個攤檔嘅職員拮魚蛋畀佢食，兼且拮一粒畀佢擺甫士影相，肥仔張可能食得仲少添。
佢解釋，為咗身形好啲，見到心愛嘅杧果黑糯米都要當睇唔到，最好急步離開就可以減少被誘惑嘅風險。原來唔係女人先會為靚而忍口嘅！
