奪得首屆金茶王寶座嘅元朗洪水橋大發餐廳成為知名食店後，名人爭相捧場，尋日就先後有煲呔曾同「新界王」劉皇發幫襯，煲呔曾上個禮拜放飛機，今次落去應該係為補鑊。發叔冇打招呼就落去，但好多茶客一見佢就嗌：「發叔，呢度有位呀！」江湖地位不言而喻。
發叔坐低後，大發餐廳嘅老闆娘彭太笑眯眯咁招呼佢，傾落至知，原來尋日上晝十一點幾，煲呔曾夫婦啱啱嚟過呢度幫襯，兩公婆只帶同一名保鏢靜靜雞到場，再冇好似上次咁勞師動眾，亦冇事先打電話去訂枱。彭太話，佢哋揀咗個卡位坐低，叫咗兩杯奶茶、一個豬扒包同一個沙嗲牛肉包，前後只逗留咗半粒鐘。
彭太冇上前打擾或要求拍照留念，但發叔嚟到，彭太就攞出手機要同發叔拍照留念，新界王嘅人氣同親和力，煲呔曾真係要學吓喇。