行政會議召集人梁振英（CY）係政壇老手，更係行會最資深成員之一，不過舊年以嚟，佢幾次發表同政府立場唔一致嘅言論，日前又撰文高談闊論特區政府嘅種種弊病，結果畀人嗌佢辭職。CY尋日出席一個場合時，好淡定咁解釋佢並冇批評政府，講到高鐵更即刻扭軚，力撐政府會用最大努力解決事件。
尋日民協主席廖成利合夥嘅律師行喺九龍開分行，CY都有去撐場，佢一改以往「逢問必答」嘅作風，對有關要佢辭職嘅問題以「唔回應」了結。不過一聽到大家話佢批評政府，佢就好大反應，即刻反駁話：「我冇批評政府。」仲叫大家返去睇清楚佢篇文章，話內容唔係鬧政府咁話！
其實CY同政府打對台都唔係第一次，早前嘅最低工資立法以至復建居屋等議題，CY都公開發表過同政府唔同嘅意見。公文袋議員梁家傑就話，既然CY已經冇跟行會嘅遊戲規則做事，為咗負責任，好應該辭職，唔好破壞成個行會制度。不過民協議員馮檢基就話，CY唔係第一個唔聽話嘅行會成員，歸根究柢都係煲呔曾領導無方，手下班細嘅先一個二個出嚟反佢。睇嚟若要盡快處理問題，煲呔曾辭職先係最妥當！