三月底屆滿旅遊發展局主席一職嘅田北俊，近日面對唔少挑戰，先有風聲傳海洋公園主席盛智文有機會接棒，跟住又輪到話經濟動力林健鋒都吼緊呢個位。尋日田少上電台，忍唔住呻最近同旅發局討論今年年中嘅旅遊推廣大計時，由於唔知下屆主席由邊個做，好多決定都落實唔到。
其實，扮嘢文對呢個傳聞嘅回覆都有啲怪，佢尋晚話政府冇人搵過佢，佢一心只想幫香港保持旅遊「一哥」地位，而且家吓身兼西九文化區董事局成員，工作好忙，如果政府真係搵佢幫手，都要坐低慢慢傾。做慣富貴大少嘅田少尋日更呻窮，叫政府唔好再減撥款，否則旅發局嘅歐美辦事處隨時要降格，由家吓嘅辦事處變成代辦，即係搵個人做代表就算嘞。
田少情繫旅發局，田二少就落區送暖，尋日踩落新界西石籬撐富貴黨第二梯隊搞嘅盆菜宴。佢話如果可為黨出力，佢一定參加五區總辭補選。