狂炳政府施政出問題

民主阿婆原定要參加元旦遊行，但據聞撞啱老公陳棣榮因十二指腸潰瘍舊病復發再次入院，所以佢都隱形咗一輪。不過，以民主阿婆鍥而不捨嘅搞局脾性點會咁易罷休？尋日佢去港大出席一個政改研討會，就食住最近好興嘅「八十後」話題大力鞭笞政府。

民主阿婆話最近反高鐵等連串社會運動，歸根究柢，係政府施政出現問題，高官問責制徹底失敗，港府無法高效管治，情況仲反映咗市民不滿港府嘅政策向部分人傾斜，如果問題唔解決，社會只會更加分化。佢一開口就鬧到停唔到嘴，抨擊港府冇恪守「一國兩制、高度自治」，對北京馬首是瞻，最諷刺係煲呔曾早前上京述職，被當面訓示要解決香港社會深層次矛盾，搞到乜都綁手綁腳，淪為跛腳鴨政府，可見「一國兩制」褪色或者根本落實唔到兩制。佢仲話，最近連串社會運動，反映香港社會愈嚟愈成熟，港府必須相應提升施政質素。

民主阿婆同煲呔曾喺港英年代被指情如姊弟，家吓卻對煲呔曾同特區政府不遺餘力咁狠批，趁港府弱勢踩多兩腳，好似驚煲呔曾死唔去咁，呢啲趁佢病攞佢命嘅狠功，真係功力高深，睇嚟呢對過氣姊弟有排狗咬狗骨！