小白觀點：狀元色狼更教壞人

有議員喺議事廳互相爆粗，互爆私隱，真係令人大開眼界。但係本欄都略嫌未夠火候，如果再引入埋台灣著名嘅「功夫政治」，一有乜嘢唔啱聽，動口兼動手打番兩個回合，咁就過癮嘞。不過有好多家長就唔係咁睇，佢哋仍然覺得啲議員好尊貴，要以身作則以免教壞下一代咁話。

查實「八十後」、「九十後」係另一種生物，唔教都壞，佢哋啲粗口仲流利過兩位議員，講到行徑離譜，有個8A狀元大學尖子，竟然大膽到當街拎嘢出嚟玩，又唔見學者出嚟話會進一步減低市民對火箭狀元嘅滿意度？最怕反過嚟兩位議員畀呢位「八十後」色狼教壞，有日喺議事廳公然格劍添呀。

網友觀點......

匿名

開會就博出位，散會就扮Friend底，當市民係傻仔，煲呔曾冇眼睇！

大話西遊

唉，兩個人好似潑婦罵街咁，講嘅嘢幼稚到極點，浪費大家時間，真羞家……

princess

會內鬧到面紅耳赤，事後走出嚟笑晒又握手，做戲咩！

明日之後

呢件事真係好核突，佢哋知唔知「醜」字點寫？

網址：www.sunsiupak.blogspot.com

阿豪觀點：三幅被拉布博出位

依家立法會會議真係好睇─只要大家唔係旨意班議員幫手解決問題就得嘞。呢嗱，最近又有議員嚟料，今次竟然係兩個大男人罵街！唉，唔怪得立法會議員喺市民心目中個地位咁低啦！

相信大家有睇呢幾日新聞，一定會對泛民議員大玩「拉布」戰術，令高鐵工程撥款辯論再押後一個禮拜嘆為觀止，班議員一味三幅被，問埋晒啲講過九十幾次嘅嘢。不過豪伯最深印象嘅，係「法律超人」批評佢哋既然係「拉布」咪認「拉布」囉，無謂喺度扮晒嘢吖。

係囉，博出位咪博出位囉，唔好扮晒嘢。老實講，如果有議員下次喺議事廳表演跳火圈或者吞劍，我下屆一定投佢一票。

網友觀點......

KK

其實邊個話依家做議員好尊貴？都係為啖飯啫，算啦，唔好咁認真好唔好？

森森

真係離譜，依家立法會內外都亂七八糟，香港無王管咁款，都唔知點收科。

Yo

立法會議員都係人，有七情六慾，其實鬧兩句之嘛，冇問題吖，只要唔出手就得啦。

波記

香港真係大劑，政府好似完全放任不管咁嘅樣，唉……

網址：www.lukchiho.blogspot.com