下雪天，留客天！鬍鬚曾被迫留港，無緣與京城財金高官「晚來天欲雪，能飲一杯無」的家國情懷一番，只能於官邸仰望天空，「每依北斗望京華」！但又不想體力過分透支，畢竟剛通過波仔，是以不想「醉裏挑燈看劍」，只好馳騁文思，寫吓個人網誌，學大教授講吓「四代香港人」，誰知「俊華一出聲，露底變花G」，畀一眾專欄作家、時事評論員噴佢不知所謂！
大佬啊！我已錯失兩次「京華春夢」，去年「十一」大閱兵，我已無奈寫少篇《女民兵要紅裝也要武裝》的遐想，今次我抒懷吓「八十後」年輕人仍然有夢有機會，咁都要笑到我面黃？香港人，怎麼胸襟咁淺窄？眼光咁短視？
鬍鬚曾，你預測財赤、盈餘一味靠估，應付金融海嘯用釘木板和貼膠紙搞掂，你果然係「戰後嬰兒」一輩的精英，連幻想、做吓大話西遊的夢也懶──好似孫悟空大鬧天宮，一支金箍棒舞得金星騰飛，忽又潛入水龍王府，蟹兵蝦將逐個被打至抱頭狂竄跪地求饒……你係「聖人無夢」，不執着！也難怪你樣樣都知，看你的網誌學通識，想肥佬唔合格都難！
「詩鬼」李賀只會「夢天」：「黃塵清水三山下，更變千年如走馬。遙望齊州九點煙，一泓海水杯中瀉。」鬍鬚曾則無夢，直觀「八十後」心頭高，又要住靚樓又要有泳池！你們是為了一個共同的美好生活走在一起──齊反建高鐵、操上羅湖橋、衝擊中聯辦，種種不和諧的深層次矛盾都有你們的參與，明顯你們是飽食無憂米！