學歌神話齋，家陣惡搵食，普通打工仔出咗半斤力，攞番足八両已經要劏雞還神啦。不過，如果係醫管局高層又唔同講法，出半斤力閒閒地攞夠一兩斤，而且仲有成揸「人辦」添。

嗱，醫管局○八／○九年度年報披露咗五名最高人工高層嘅薪酬，前九龍西聯網總監趙莉莉原定○八年退休，獲額外續約九個月。原來「翻閹」收入好和味，呢段時間個個月出「雙糧」，除咗醫管局嗰份，仲攞埋公務員退休前休假嘅人工，年薪近四百八十萬，仲高過行政總裁蘇利民，成為醫管局年薪「一姐」。

至弊出一分力攞超過一份糧嘅唔止一個，同樣係退休後再續約嘅廣華醫院及黃大仙醫院行政總監鄧燦洪，因為一年無放大假，醫管局用差唔多四十萬買起佢成年大假，舊年年薪近四百萬，僅次於蘇利民排第三。

包括蘇利民在內其餘嗰三個，舊年人工加幅由百分之四點六到百分之六不等，其中新界東聯網服務總監連續三年都有人工加，累積加幅接近兩成，一樣咁和味。

叮！高層你攞多份、佢加多啲，前線資源緊張冇人理，一味顧住肥自己，唔怪得基層醫護人員心都淡，士氣愈來愈低落，甚至「集體逃亡」啦。公共醫療醫生協會負責人話，沙士至今，基層員工人工加幅唔夠百分之五，但高層加薪多幾倍，簡直離晒譜！

有立法會議員批評醫管局「返同一份工畀兩份人工好混帳，等如將納稅人啲錢掟落鹹水海，食物及衞生局應調查！」嗱，咪話唔提醒身為食衞局局長嘅周一嶽呀，如果資源繼續錯配，前線醫護人員做到一殼眼淚，公立醫院遲早會玩完。

醫管局啱啱至被踢爆，「勞斯萊斯」級總部大樓入面嘅大型會議廳使用率長期偏低，長開十二年冷氣防霉，浪費公帑又唔環保，當局惟有再慷納稅人之慨，準備用一千二百萬改裝。

話時話，醫管局醜聞不斷，好明顯係高層管理出咗問題，按道理應該另請高明至啱數㗎。但當局反而一次次同啲應該退休嘅高層續約，仲容許佢哋累積一年大假唔放，以薪買假攞多啲着數，咁嘅情況喺私人機構根本冇可能發生。

好明顯，當局並唔係真心希望改善公共醫療服務水平，而係肥上瘦下，千方百計保住成班自己友嘅共同利益。而且，當局每年年報只公開人工最高嗰幾個，其他高層薪酬欠透明度，咁即係明搵納稅人笨啫。

叮佢個鎯鎯！醫管局管理層個個「肥到連襪都着唔到」，無所事事之餘，仲要窮奢極侈，狂攞着數，試問仲邊有錢改善醫療服務吖？