CY批評港府制訂政策一直缺乏長遠規劃，叫煲呔曾應該要有視野，直接同市民接觸，又話香港貧富懸殊嚴重，如果樓價高企問題唔解決，市民就會怨氣累積。總之，CY筆下嘅煲呔曾同港府一無是處，唔知仲以為呢篇係反對黨派嘅會刊。

另一行會成員鄭耀棠亦公開表態，指行會非官守成員有權進諫，又對政府施政缺乏遠見嘅批評大表認同，好似廣深港高速鐵路諮詢做得唔夠好，同內地合作又歎慢板。棠哥講到理直氣壯，簡直當煲呔曾冇到。

政府被視為自己友嘅行會成員咁樣狠批，政務司司長唐唐尋日笑笑口唸書，話政府會本着以民為本理念施政，構建和諧社會，而整個特區管治團隊亦都本着呢個原則做事。

學者宋立功指CY嘅舉措會喺一定程度上打擊政府管治權威，相關政策局長嘅心情一定唔好受。其實，計我哋話，最唔好受嗰個肯定係煲呔曾，咁樣被自己嘅閣員狠插，眾叛親離，點會唔心酸。但煲呔曾唔得人心，要怪就怪自己施政失效、管治無方；試問如果你做得好，就算CY同棠哥作反，都搵唔到位入啦。