聽日立法會內務委員會就推選白鴿黨議員甘乃威求愛不遂炒女助理嘅調查委員會七名成員，但到大前日截止報名只得四名議員參加，以為調查泡湯啦，點知尋日出現戲劇性轉變，聽聞建仔過去兩日積極游說多三個建制派議員參加，仲聲言最後唔夠人就由佢哋派人包底咁話，咁係咪話建仔加多隻腳要踩死甘威？
報咗名參加調委員會嘅四隻「鐵腳」，包括經濟動力梁劉柔芬、建仔劉江華、專業會議梁美芬同工業界林大輝，點湊都只係一枱麻雀，如果湊唔夠七人法定人數，調委就會無限期擱置。正當甘威準備印印腳之際，尋日忽然傳出保險界陳健波、富貴黨方剛同黃宜弘會捱義氣入會。
陳健波一直支持調查甘威，希望查個水落石出，加上估計開幾次會就搞掂，所以佢應承加入。相反方剛就認為調查甘威係浪費時間，尋日仲表明堅拒加入調查添。至於黃宜弘就話已經參加咗三個調查委員會，工作好繁重，就算捱義氣都唔應該輪到佢喎！咁嘅形勢，睇嚟呢個爛攤子都係由建仔包底居多嘞。