財委會主席劉慧卿已經交代立法會秘書處備妥三文治、生果同埋水畀大家醫肚，而經濟動力嘅林健鋒就準備喺附近酒樓開枱，等到要投票時先趕返嚟。

飲食界議員「肥仔張」張宇人就話，反高鐵嘅人「苦行」，議員就「苦坐」，佢會叫相熟嘅中環食肆開夜啲，為同僚提供到會服務，仲話佢請客，佢鬆毛鬆翼咁話：「飲食界係一個有用嘅功能組別，我仲有特別功能，唔使旨意取消！」班泛民主派唔停咁話要取消功能組別，肥仔張擺明乘機抽水啦！