中華廠商聯合會永遠名譽會長楊孫西早前喺工展會都開咗兩個茶葉檔，當中最貴嘅係名茶野生大紅袍，兩両賣成四千八百蚊，聽聞話銷情麻麻。不過佢做生意係老行尊，又點會做蝕本生意呢？佢話大紅袍係比較貴，但佢哋嘅貨豐儉由人，其他茶葉賣得好好，整體營業額仲高過上年一倍添！
見佢講生意經定過抬油，原來佢做司儀仲淡定，尋日佢出席一個座談會幫手做主持，席間要用「煲冬瓜」做主要語言，本身係福建人嘅佢講得字正腔圓，仲好流暢，連「貓紙」都唔使點睇。不過，佢謙稱自己講得麻麻，加上有人幫佢寫好稿，所以唔係好難，事前亦唔使特別背稿。睇嚟下次再有活動搞，可以繼續搵佢做金牌司儀喎！
