高鐵撥款申請原本喺上個月十八日表決，但喺泛民嘅「拉布」策略阻撓下，押後到聽日再傾過，當時就有風吹出嚟話泛民玩嘢係衝住財委會主席、白鴿黨副主席劉慧卿而嚟。不過，卿姐罕有咁建議今日再開特別會議，話去表決係咪接受黎廣德班人嘅非分要求。

老實講，政府提出嘅撥款申請事前會喺相關嘅事務委員會傾晒，到咗最後先會交畀財委會表決，但卿姐話要召開特別會議傾係咪再聽意見，睇嚟事有蹺蹊，難免令人覺得佢係想將個波踢畀建制派，等佢哋去否決泛民，而佢就唔使做醜人。

或准「專業人士」插場

到咗尋日場戲又有新發展，有白鴿黨人度橋將個波拋畀富貴黨主席Miriam劉健儀，話不如叫黎廣德去咗Miriam做主席嘅鐵路事宜小組先，反映咗意見，財委會咪唔使開特別會議囉！

但Miriam搵完黎廣德，返嚟嘅回覆係黎廣德冇興趣去鐵路小組傾，都係想去財委會。就係咁，白鴿黨嘅奸計唔得逞，個燙手山芋拋嚟拋去，終於又拋番畀卿姐。

避無可避，卿姐考慮喺聽日長達六小時嘅會議上畀班「專業人士」插場表達意見，但又有口痕友話，公文袋有第二個渠道表達意見都唔去，擺明玩卿姐啦！不過，卿姐喺高鐵嘅政治傾向都引人爭議㗎，有人覺得佢咁包容泛民節外生枝，真正嘅用心路人皆知啦！而卿姐就辯解自己唔係有乜政治傾向，而係公平、公正去處事啫。

聽日生死決戰，建制派已布陣迎戰泛民，身兼內會主席嘅Miriam決定將開會時間由二點半提早至二點十五分，延遲至三點四十五分結束，務求一次過傾掂甘威同河蟹事件，以免阻撓隨後召開嘅財委會進展，預計要開到十點打後。