小白觀點：郵局咁多Cash使乜搶袋

幾個大賊光天化日強搶郵袋，聽講係香港開埠以來第一次，幾令人震驚。不過喺外國劫郵車時有發生，呢嗱，六十年代英國曾經出現一個好傳奇嘅郵車大盜，劫走咗幾百萬鎊。雖然後尾畀人捉咗去坐監，但呢位仁兄真係神通廣大，坐咗一陣就玩PrisonBreak，過咗幾十年後至自首。

不過今次香港呢單就未免騎呢一啲。冇錯，近年郵政署開始不務正業，十個櫃枱有九個係畀人交乜費物費，收收埋埋啲Cash，話唔定啲錢隨時多過啲橫頭橫尾銀行呀。問題係，由於好多郵局都係冇掩雞籠不設防，賊佬堂堂正正入去拎都得，使乜搶咁大陣仗呢？郵袋中有啲乜呢？會唔會當中有一個港版海角七號？真係好引人入勝！

網友觀點...X）...

[　子祥　]

呢單嘢真係離奇，唔通郵袋之中有藏寶圖？

[　kelly tam　]

有人畀錢叫人偷信，計我話呢，其中一袋有類似遺產嘅信物。唔係點會咁搏去偷吖。

[　攪攪震　]

郵政局話係普通信件冇得賠喎！車，對信件主人就係好重要嘅信啦，咁樣就當冇事，好唔負責任喎。

[　billy　]

海角七號賊仔版，咁就一啲都唔浪漫咯，分分鐘變海角七夜，又或者旺角七號呢！

網址：www.sunsiupak.blogspot.com

阿豪觀點：唔通係環保人士抗議？

香港發生開埠以嚟第一宗郵袋被搶劫嘅案件，認真騎呢。照道理計，郵袋從來都係令人厭惡嘅物品，尤其係對郵差叔叔嚟講，有時真係必欲棄之而後快！呢嗱，德國有個郵差為咗偷懶，竟然將兩萬封郵件收埋喺自己屋企地庫，最終因為冇位擺要扔掉，先至畀人揭發，依家郵袋竟然成為搶手貨，真係天下奇聞呀！

事實上，郵袋又冇乜寶，反正呢個時代已冇人再親筆寫信㗎嘞，所謂「家書抵萬金」呢句嘢已out到唔out，家陣郵袋裏面最多嘅，相信除咗帳單外，最多就係商業宣傳產品，大部分都係直接進入垃圾桶，簡直係樹木嘅天敵。咦，「郵袋大盜」會唔會係環保人士嘅抗議行為呢可？

網友觀點...X）...

[　傻仔　]

冇理由呀，照計郵袋冇乜值錢嘢喎，寄現金唔係犯法嘅咩？

[　匿名　]

係咪有人博出位呀，好似美國佬扮個仔上咗氫氣球飄走咗，等電視真人騷搵佢做主角……

[　無病呀？！　]

乜原來派信都有外判嘅咩？我見畀人搶郵件嗰位仁兄，佢架客貨車都好型吓喎！

[　無名火　]

搶完之後又原封不動放喺其他地方，咁無厘頭，擺到明係行為藝術啦！

網址：www.lukchiho.blogspot.com