07/01/2010

播放本新聞相關短片

死者胞姊:唔會再有新年中秋

【本報訊】孝順仔梁志榮前年中秋與友人一同迎月,卻命絕大浪灣。「我細佬離開之後,屋企永遠都唔能夠團圓,永遠都唔會再有新年同中秋節。」梁的大姊昨聞判後直言:「就算有人要坐一世監都彌補唔到!」她稱現時心情仍未平復,腦海不時浮現胞弟的遺容:「我細佬塊面被人打到黑晒瘀晒,個嘴好腫,佢係畀一班無人性嘅人打死㗎!」

死忌憑弔 睹被告歎下午茶

任職廣告工程的梁志榮是家中孻仔,有兩姊兩兄,生前與父母同住。梁的兩名胞姊及叔父昨到庭旁聽,大姊形容胞弟為人溫馴,從不惹事生非,與家人感情深厚。

志榮早年眼見兄姊均成家立室,便自願肩負照顧兩老的責任,「個個月將三分之二嘅人工畀爸爸媽媽做家用同供樓。」她指志榮為人內向寡言,平日多留在家陪伴父母:「嗰日唔知點解會去嗰度燒烤,搞到冇咗條命……」

梁志榮不幸遇害,其年邁雙親深受打擊,心情最近才稍為平復。梁姊表示,兩姊妹因思念胞弟,經常到大浪灣拜祭,去年中秋節前即梁志榮的死忌,她們亦有到案發現場憑弔亡弟,當時目睹其中一名被告同太太在現場歎下午茶,令她們更添悲憤。

梁志榮的家人日內會到其靈前告訴他判決結果,希望他得以安息。對於有被告稱希望道歉和拜祭胞弟,梁姊激動說:「唔好騷擾我細佬!」她說:「每次到庭旁聽,我只係見到各人神態輕鬆自在,根本就毫無悔意。」她又對於有多名被告早前獲無罪釋放感到無奈:「法庭幫唔到我細佬取回公道。」