話時話，呢個教師真係十足賤男。佢喺地鐵站見到一個着低胸背心同迷你裙嘅女仔，就用手機偷影人哋嘅裙底，仲影咗十五張咁多。點知畀人當場捉到，後來喺法庭認罪，被判二百幾小時社會服務令。但奇就奇在，佢呢頭被定罪，嗰頭就去咗另一間學校執教鞭。

咁都得！明明有風化案底，點解都會請㗎？呢種色情狂，畀個細路佢教，咪等於送羊入虎口？更奇嘅係，件事係由學生首先踢爆，同學之間竊竊私語。有女生直言，知道學校有色情狂，但係又唔知邊個係，如果唔好彩畀佢偷拍裙底咪好蝕底，惟有多穿打底褲自保。

校方承認，請人嘅時候冇主動查問佢有冇案底，對方亦冇主動申報。校方實在太官僚，其實呢單案事發時通晒天，校方稍為問多兩句，就可以知道真相。但係佢哋偏偏聽淫師一面之辭，唔中招至奇。

不過，又唔怪得晒學校嘅，講到底，教育局難辭其咎。教育局喺淫師到校兩個月後至通知校方，話佢曾經干犯刑事罪行，叫校方關注，唔係遲早會曝光，但係又冇講點處理，直情係卸責。

教育局回應本報查詢時仲話，任何人如果要喺本港註冊學校任教，必須向教育局註冊為教員，仲要申報個人有否干犯有損品格嘅刑事罪行。申請人如申報曾干犯罪行，局方認為佢唔適合做教師，可以拒絕申請。

呢條規定好似幾嚴謹，可惜形同虛設，因為教育局冇規定註冊教師應徵教師職位嘅時候，要主動向學校申報有冇犯過罪，亦冇規定校方要審查申請者有冇案底。而現時註冊教師定咗罪，使唔使吊銷教師資格，亦由教育局話晒事。更弊嘅係，教育局以私隱為理由，唔肯向學校披露註冊教師涉及性罪行嘅資料。

叮佢個鎯鎯！咁樣做實在太荒謬，正如有教育界人士話齋，教師有冇風化案底，已經唔係私隱，而係關乎佢仲適唔適合教書嘅大事。

所以話，教育局嘅教師註冊制度漏洞百出，唔怪之得有業界人士直斥「只管註冊，唔管操守，封閉資料，懶理學生嘅生死」。

當局罔顧學童福祉，淫師就變本加厲，家陣學校真係乜都有，有教師同未成年女學生去時鐘酒店開房，有教師同女學生玩「車震」。由○六年至○八年，就有七名教師涉及性犯罪被法庭定罪。咁樣搞落去，學生仲邊有心機讀書呀？政府係時候做番啲嘢嘞。叮！