王英偉嘅公子梓軒，擁有美國康乃爾大學心理同現代舞雙學士學位，啱啱獲得電台頒發「新人王」獎，近日更獲電影公司睇中，將參與拍攝一部講述年輕人熱愛舞蹈嘅電影，升呢做埋銀幕明星。尋日浸大電影學院宣布成立，唔少電影大老闆同名導演到賀，電影發展局主席蘇澤光率先代表發展局「科水」，將一張三百四十萬元支票交畀浸大校長吳清輝同王英偉，「成龍慈善基金」亦承諾五年內每年捐十萬蚊撐浸大。

王英偉就拖住佢嘅歌星囝囝四圍同世叔伯打招呼，自己亦笑得好開心。唔少人慨嘆香港電影一池死水，蘇澤光就唱反調，話大中華地區影視數碼媒體產業近年急速發展，中港合資嘅電影大收旺場，電影業人人有工開，部分職位仲請唔到人，仲要加快培訓新人喎。