內地多個省市受大風雪吹襲，哈爾濱早幾日更創下三十年嚟最嚴寒嘅元旦日紀錄，合和董事總經理胡文新（Thomas）啱啱喺元旦日率領香港業餘冰球會去哈爾濱，參加喺當地舉行嘅國際業餘冰球邀請賽。Thomas係超級冰球迷，今次可以喺嚴寒天氣下打波，佢話冇獎攞都好過癮。
Thomas話，冰球要喺冰天雪地嘅環境下打先有氣氛，平時佢哋喺九龍灣MegaBox溜冰場打波，最低氣溫都有攝氏零度，但哈爾濱就凍到得零下三十度，佢同隊員都有落場比賽，雖然最終無緣攞獎，不過Thomas都話喺零下三十度打波打到出晒汗真係非常過癮，所以輸贏一啲都唔重要。
呢次出戰東北，Thomas可謂出錢出力，除咗親自領班外，仲以香港冰球訓練學校嘅名義贊助全隊共十九人嘅機票連食宿，認真唔話得。