五散人保持自由身

向前走大聯盟先後公布發起人達一百四十四名，陣容雖然鼎盛，但人員大都係人大政協、建仔、工聯會甚至富貴黨議員等，政治色彩濃厚，且被指背後有西環力撐，據聞棠哥招手時好多人請佢食檸檬，好似「五散人」成員會計界陳茂波就話，大聯盟嘅親政府色彩太過濃厚，唔想加入咗就要支持現有嘅區議會政改方案。

另一「散人」保險界陳健波亦表示，佢哋五個最着重係保持自由身，唔接受任何綑綁行動，唔想依家就舉晒腳支持，將來要臨急轉軚。葉劉淑儀就強調支持政制向前走，同支持政府嘅政改方案係兩回事，佢對現有方案有保留，所以要保持獨立思考；謝偉俊更質疑大聯盟只係「門面工夫」。

咁Jeffrey成立嘅「工商界政改動力」（下稱動力）又點呢？首日已經話有超過一百零八個工商界人士加入，睇番份名單，不乏城中富豪嘅代表，好似何鴻燊家族中人、嘉華集團太子爺、合和胡應湘、印度富商後人夏雅朗、華置劉鳴煒，亦有前恒生大班柯清輝同蘭桂坊之父盛智文。動力倡議政改應該係先討論二○一二年嘅選舉方案，行出一小步後，再討論未來嘅普選政改方案，呢招避重就輕恰到好處，估計可吸引好多厭惡爭拗、爭取獨立嘅人參加。

講到尾，呢兩個爐灶各有各特色，最終要睇邊個捧出嘅菜式受政界人士青睞，甚至獲社會接納，所以嚟緊一段時間，棠哥同Jeffrey喺政改大廚房入面有排表演嘞。