小白觀點：最好有飛虎隊幫手爆門
香港嘅人民警察真係為人民謀福利，不過呢啲福利同好市民冇關，而係專為賊佬而設。話說警方唔知發乜神經，喺深水埗貼晒街招話畀全世界知邊度保安有漏洞，仲慌死賊佬唔曉，好詳細咁教埋各種盜竊方法，務求賊佬一擊即中，滿載而歸，真係周到。
不過對於一啲笨賊嚟講，可能咁都覺得嫌麻煩，警校不如開個犯罪入門校外課程，再唔係就送佛送到西，派埋飛虎隊幫手爆門，再搵一隊PTU幫手搬嘢好唔好？
所以話呢，依家啲港產警匪片嘅劇情認真弱智，警隊一個二個自動自覺用Foxy放料，邊個係臥底，仲有查案嘅進度係點，應有盡有，使乜派個臥底混入警隊攞料咁笨吖！
網友觀點......
成哥
可能警察諗住用呢啲蠢方法裝賊呢，笨人捉賊！
CoCo
唔怪得周街咁多賊啦，警察咁蠢，唔做賊就笨喇！
賊王
街招寫得幾仔細呀，除非唔識字嘅啫，唔係都去做賊啦，又捉唔到嘅！
匿名
香港畀呢班蠢人維持治安，真係命仔都短啲呀！
網址：www.sunsiupak.blogspot.com
阿豪觀點：《警訊》照辦煮碗有好戲睇
各位冇睇錯，個題的確係「警方盜竊指南」。事情係咁嘅，警方喺深水埗爆竊黑點大廈張貼海報，勸居民做足防盜措施，點知張「通告」連出事單位地址、匪徒犯案手法（包括細緻到用卡片開鎖），甚至乎事主唔見咗乜嘢財物都巨細無遺咁寫晒出嚟。咁搞法，匪徒只要照住份「指南」去做，就實得米啦！
份警方「通告」寫到咁detail，爭在未將成個犯案過程畫成連環圖咋喎。嘩！如果由佢哋負責製作《警訊》，咁就死得人啦！容乜易佢哋呼籲市民防範非禮一類嘅風化案件，又將成個過程如實咁重現一次，仲加埋受害人嘅詳細聯絡方法㗎！到時為禍分分鐘大過「動新聞」呀！
網友觀點......
f@i
警察教爆竊點撻嘢，都幾得意，hehe~~
cecilia
之前被爆格嘅戶主，真係多得佢哋唔少，畀人尋仇都唔知咩事！
醜陋低解像
地址呢啲係私隱嚟o架，點可以隨便公開？有冇問過戶主o架？警察做嘢幾時都咁冇腦……
見鬼2
係邊棟大廈先？快啲單聲，等我去學吓嘢。
網址：www.lukchiho.blogspot.com