照理講，啲高官由年頭忙到年尾，最終收到張滿江紅嘅成績表，大家應該深表同情，之但係，太一叮將佢哋嘅表現左睇右睇，前睇後睇，又唔可以唔承認，啲小朋友嘅評價真係十分中肯，萬分準確喎。到底當中出咗乜嘢問題？前申訴專員戴婉瑩有句話講得好，因為啲官一年到尾忙住救火，根本唔知道問題嘅根源。

就攞最低分嘅醫療服務嚟講啦，係人都知，本港公立醫院之所以亂象叢生，唔係因為資源不足，而係因為整個公共醫療架構疊床架屋，將錢攞晒嚟請啲無無謂謂嘅高層。但係食物及衞生局局長周一嶽始終無去解決呢個問題，淨係識得喺出事後出嚟孭鑊。而曾蔭權不但唔去追究周一嶽嘅失職，反而整個金紫荊星章嚟獎勵佢，結果咪兩兄弟累鬥累，搞到成個公共醫療烏煙瘴氣咯。

醫療高層愈來愈多，使喺前線醫護身上嘅錢就愈來愈少。近年來，唔少前線人員轉投私家醫院，令留喺公立醫院嘅醫護承受愈來愈大嘅工作量，形成惡性循環，因為頂唔順啲工作壓力，瑪麗醫院護士上月甚至集體請病假嚟抗議，搞到三十宗手術要延遲進行。單計舊年，全港公立醫院已經有七百幾個護士離職，其中港島東聯網係重災區，護士流失率高達百分之五點八，面對即將來臨嘅豬流感第二波疫潮，真係唔知佢哋點樣應付。

眼見公院護士不斷逃亡，一嶽局長眼光光咁，完全束手無策。上次瑪麗醫院護士集體請假，周一嶽話要調動其他醫院嘅人手去協助，今次全港醫院護士荒，醫管局護理總行政經理馮玉娟就表示，局方會檢討護士嘅薪酬待遇，又對啲前線手足沙晒冧咁話：「個個護士都做得好慘，但人手請得都請晒，依家最關注點樣留人。」

叮！早知今日，何必當初！你班高層將個醫療系統搞到亂七八糟，自己嘅豐厚年薪就袋袋平安，家陣逼到啲前線護士買少見少，先嚟「檢討薪酬待遇」，情深款款咁勸人留低。嗱，衞生服務界議員李國麟就講得啱啦，佢話醫管局根本就無出手留人，「留喺公院無前途、環境唔好、培訓又唔夠，無論年輕定資深護士都唔會留低！」

此情此景，令太一叮諗起《孫子兵法》中嘅一句話「先暴而後畏其眾者，不精之至也」。家陣醫療高層對啲前線手足前欺後恭，可謂不精之至，醫療隊伍潰不成軍，已經出現敗軍之象。面對隨時爆發嘅第二波豬流感，太一叮忠告香港市民，醫局靠唔住，大家都係保持清潔，多啲休息，自求多福啦。