小白觀點:依家有乜片網上睇唔到
聽聞又有人想搞免費電視,唉,對於小白老弟呢啲已經移民咗去網絡世界嘅觀眾嚟講,真係唔知應該恭喜佢好,定係同情佢好。老實講吖,依家有乜嘢片網上睇唔到㗎?好似話小弟最鍾意煲嘅美劇為例吖,內地大把翻譯專才連夜搞定字幕,大家千祈咪以為係侵權呀,佢哋認真盞鬼,講到明係教學之用㗎!《24》、《Lost》、《鬼線人》幾乎同美國同步,唔似得某個電視台買咗返嚟放N年至拎出嚟播。喂!你估啲劇係酒咩,愈舊愈醇呀?
好嘞,至於話新聞資訊,免費電視就更加唔係網嗰皮,要睇梗係上網睇ontv新聞台啦,又快又新又準確,使乜限時限刻睇是是旦旦嘅CCTV咁老襯吖!
網友觀點......
阿威
依家啲垃圾電視節目電視劇睇壞人,早啲瞓覺好過。
妹妹
多一個電視台都好嘅,多個選擇吖嘛,算係悶之中有得沖喜吓,咪睇吓搞成點囉。
Tommyboy2010
多個台都好吖,唔使畀一個台壟斷,你睇版權風波就知啦,一個台唔播謝安琪就冇得睇,幾冇癮!
軒仔
呢場電視風雲好睇過啲電視劇啦!多啲人開台仲好呀!
網址:www.sunsiupak.blogspot.com
阿豪觀點:反智節目對政府有着數
家陣香港免費電視嘅形勢好簡單,兩台競爭幾乎係壓倒性咁滯。唔知點解,日前仍然傳出有人向政府申請免費電視節目服務牌照。
吖,唔知有冇機會邁向免費電視嘅三國鼎立時代呢?真係唔明白點解仲有人會對免費電視呢行有興趣同信心。依家最多人睇嘅電視台同電視節目,唔係因為佢哋嘅內容有幾豐富,而係扭開電視機已變成一種習慣。最經典嘅故事係,話說某強勢電視台有一日發射站有故障,觀眾只係收到雪花,結果佢哋個收視都係贏晒。
不過話又講番轉頭,如果我係政府一定即刻批個牌出嚟。依家啲電視節目咁反智,市民睇得多可能會覺得政府表現唔錯喎……
網友觀點......
多舊魚
支持增加免費電視台,唔好畀兩台——唔係,係一台獨大!
spanish lesson~
唔係潑冷水,以香港寬頻嘅規模,要營運免費電視真係冇可能,有線做咗十幾年就差唔多……
joe爸爸
外國一般都有好多免費電視頻道,係香港咁怪胎得兩個台玩晒,我哋根本冇選擇權。
tonyisme
我諗依家最驚嘅係亞視,一個台唔夠,仲要應付多一個,仲唔畀人打殘?
網址:www.lukchiho.blogspot.com