踏入新嘅一年，「健康快車」前晚喺灣仔君悅酒店筵開四十幾席嘅「富貴吉祥紅盆宴」，做咗個會名譽主席嘅陳振彬（Bunny）帶埋太太同兩個可愛囝囝一齊嚟支持，佢哋一家啱啱去咗北海道滑雪，Bunny仲整傷條腰添，但佢話冇大礙，仲同六歲嘅大仔組成父子兵由山頂滑落嚟添。
「健康快車」創會主席方黃吉雯舊年以一身金裝現身，今年就改着紅色示人，同樣咁高貴。「郭太后」謝雪心為活動做主禮嘉賓，同小吉兩個唧唧噚噚好多嘢交流。
講番個盆菜宴，今年都係由楊貫一主理，入面有齊各樣盆菜靚餸，鮑魚則分開上，一共籌得九十幾萬。佢哋仲希望今年大家齊齊「開紅盤」，「健康快車」籌多啲錢，各人又搵多啲兼身體健康啦。
