拜月老一般都係求姻緣，不過，保險界立法會議員陳健波早前同屋企人去台北玩，同去供奉咗一百六十六尊神明嘅龍山寺，佢個十九歲大仔一入到廟就飛奔咗去拜月下老人，祈求喺二十歲前開齋拍拖。但波哥聽到阿仔呢個願望之後，個心好唔踏實，轉個頭就偷偷再向月老許願，祈求阿仔到三十歲先至識到女仔。
唔係啩，邊有人希望阿仔三十歲先識女仔㗎？波哥話，佢只係希望月老最終可以中間落墨，最快廿五歲先畀阿仔拍拖，事關二十歲仔就拍拖實在太早喇，兩代之間有代溝，佢哋父子已經係一明證啦。
佢仲話，經過一年多嘅議會生涯同折騰後，今次佢都祈求香港社會少啲爭拗、立法會工作順順利利。佢預期五名泛民主派議員正式辭職後，立法會運作會有效率得多，起碼唔使成日因為有人掟蕉爆粗而搞到流會。