03/01/2010

播放本新聞相關短片

政情:煲呔曾心虛 奶茶騷甩底

本港存在深層次矛盾,煲呔曾上京時更被領導人公開訓示要佢妥善解決。點知佢曲解深層次矛盾係經濟問題,管治手法迹近耍賴,尋日晏晝,煲呔曾唔知係咪心思思想落區做騷,忽然搵人通知憑港式絲襪奶茶勇奪首屆茶王寶座嘅元朗洪水橋大發餐廳,話佢會去食嘢,結果搞到餐廳上下悉心張羅,點知一個鐘後佢又甩底,咁樣出爾反爾,睇怕煲呔曾製造矛盾叻過解決矛盾喎!

尋日晏晝十二點,大發餐廳收到煲呔曾「會嚟食嘢」嘅通知,仲要求預留兩張枱,指明一張係圓枱,一張坐卡位。餐廳老闆彭氏夫婦仲預備靚奶茶、招牌豬扒包,同一碟「苦盡甘來」嘅苦瓜炒飯,希望煲呔曾能夠體恤民間疾苦,同市民分甘同味。

可惜之後接到電話要取消訂枱,但目擊者話,曾經見到煲呔曾坐住架香檳色七人車喺附近兜過,仲有交通警及AM車牌嘅政府車,餐廳門口亦一度有便裝警員守住添,勞師動眾成咁又臨時縮沙,唔通驚現場有記者?

大發餐廳四十幾名員工絕大多數都嚟自天水圍,原本以為煲呔曾入嚟幫襯,可以多啲了解佢哋嘅生活,「隱世茶王」賴師傅話,煲呔曾想飲奶茶,梗係要嚟茶餐廳啦,淨係去酒店歎咖啡點知道民間疾苦呢?