03/01/2010

播放本新聞相關短片

政情:莎姐湊孫為樂懶理政事

五區請辭鬧得政壇一片亂哄哄,富貴黨前副主席周梁淑怡卻完全當冇件事,尋日仲同大女智美喺中環歷山大廈Cova餐廳食午飯撐枱腳,問到會唔會補選時,莎姐話弄孫為樂,補選問題都未有時間去諗,呢個答案搞到記者出身嘅智美都好奇,忍唔住一齊向莎姐逼供:「話時話,我都想知(你選唔選)喎!」

智美舊年十一月添丁後,已湊成個「好」字,加上細妹智琪又生咗個囡囡,莎姐真係有孫萬事足,對於我哋嘅逼供,佢只係笑笑口話:「連個女都問我,證明我未傾過啦!老實講,我已經唔係政治圈嘅人,加上我咁忙,仲有三個孫仔孫女等住我玩!」莎姐生活優哉游哉,早排聖誕節去咗台灣旅行浸溫泉,寫意到極,佢會唔會再走番入個樊籠裏面真係好難講。