03/01/2010

播放本新聞相關短片

政情:肥亨送細女上京學中文

二十一世紀隨時係中國人嘅天下,中文同英文嘅地位亦愈拉愈近,身兼大學教授嘅中策集團主席馬時亨深明呢個道理,仲送咗自己滿口英語嘅細女露玲去北京讀書,早排佢哋一家人專登去北京探望喺清華大學讀中文課程嘅露玲。回港之後,一家人尋晚又偷閒去睇演唱會,肥亨陪住太太同兩個乖女,真係笑到見牙唔見眼。

肥亨話,露玲過去一直喺外國讀書,搞到滿口英語,成個鬼妹仔咁,送去北京學吓中文同普通話都係好事嚟嘅。肥亨自己都好學不倦,最近仲參加咗個主題以中文正音正字嘅電視節目,學識好多從未見過兼且難讀、難明嘅中文字,佢仲好硬銷咁大讚節目好正氣同有益添。

新一年開始,肥亨話會繼續以兼職方式做吓電台節目同到大學教書,最重要係逍遙自在,唔會為自己增加任何壓力喎!