照咁睇嚟，金勞詹落港島區鬥公文袋嘅陳淑莊、白姐姐落九西鬥黃毓民嘅原本布局未必成事。點解金勞詹過咗個新年就變陣呢﹖賭術精湛嘅佢近期去咗拉斯維加斯連賭十五日，不過，佢話冇乜大斬獲，只得一個「唔贏又唔輸得多」嘅結論，唔知係咪咁，佢要重新考慮未來嘅輸贏呢﹖

白姐姐落硬九西鍊過

政壇其實早有人放風，話唔少金融業界擔心一旦金勞詹辭職，無人維護業界權益。而賭場失意嘅金勞詹又認為，唔少市民對政府要花費一億五千萬做補選好有保留，佢個人都覺得唔值得花呢筆錢，仲估分分鐘立法會可能唔通過補選嘅撥款。所以依家佢係咪會跟住辭職，就要睇定啲，起碼都要立法會通過咗撥款先算喎！

金勞詹嘅姿態一縮再縮，愈講愈保守，仲話依家講定係咪百分之百辭職就言之尚早，又指政治有好多變化，今日唔知聽日事，凡事都唔可以講到咁實喎！睇嚟，佢落港島區補選嘅可能性真係愈來愈細囉。

一個有心縮沙想撤回押注，另一個白姐姐就繼續做場邊熱身嘅人，準備落九西同鬧人唔使本嘅黃毓民鍊過，佢前日出席一個元旦活動時都話，新年願望就係「處置黃毓民」，而一直伴隨白姐姐左右嘅立法會議員謝偉俊就話會全力協助白姐姐達成呢個願望，睇嚟兩個人志同道合要打一場硬仗。