呢啲的士都係喺同一油公司嘅加氣站入咗石油氣之後，就變成咁樣嘅。的士業界懷疑，係因為石油氣品質有問題，正如香港汽車工業學會會長李耀培話齋，的士集體發生故障，應該唔係機件故障引起嘅，估計係燃料有問題。有業界人士直情懷疑，可能係油站嘅儲氣缸積聚雜質，污染咗石油氣。

唔好以為的士死火係小事，有司機話，架車行行吓死火係好危險o架，如果喺高速公路上面行緊，前後都有貨櫃車，突然間死火，咁就死硬。黃大仙有一架車就係因為忽然死火，被撞到車頭都爛晒，唔死人都算好彩咯。咁搞法，唔怕就假。

話時話，咁嘅事，以前真係聽都未聽過噃，呢間油公司當然應該畀大家一個交代。之但係，政府更難辭其咎，實際上，正正因為機電工程署監管懶懶閒，先至搞到全行七國咁亂。

其實的士集體死火嘅事，唔係呢幾日先至有嘅。事實上，本報上月初就曾向機電署查詢有關油公司嘅石油氣懷疑損壞汽車部件一事，署方當時回應話，根據該油公司嘅石油氣品質報告，未有發現違反《氣體安全（氣體品質）規例》嘅規定。又話機電署已敦促油公司確保石油氣嘅品質符合法例要求咁話。

咁就奇嘞，油公司喺事件中應該係被調查對象，機電署點可以憑油公司一面之辭，就確定石油氣冇問題？本來呢，喺咁嘅情形下，機電署應該做全面調查，搵出事故原因，但係班官僚就關人個關，根本唔去跟進。

好嘞，依家愈嚟愈多的士死火，業界嘅意見亦愈嚟愈大，齊齊向機電署投訴，署方先至話，較早前已經接獲投訴，現時正同業界跟進。但係機電署始終唔肯講，石油氣品質係咪有問題。

叮佢個鎯鎯，機電署詐傻扮懵，油公司就攞政府做擋箭牌。油公司發言人話，佢哋現時賣嘅係中東最優秀冷藏貨，由英國石油公司供應，符合政府標準，港府抽驗結果亦顯示石油氣品質冇問題咁話。照咁講，問題就大嘞，請問機電署署長陳鴻祥，政府如果真係抽驗過，點解唔將結果向市民公布呀？

一句講到尾，機電署係想卸責啫，不過，太一叮要提醒呢班官僚，呢單嘢唔係可以攞嚟開玩笑嘅，依家就話未造成傷亡啫，但係唔會成日都咁夠運嘅，如果唔好彩爆鑊勁嘅，睇你哋點收科。叮！