小白觀點：醫療失誤率急起直追

喺全國咁多個城市當中，香港嘅成長競爭力排名一年衰過一年，依家更加跌到落第十一位，畀青島、大連以及重慶呢啲大城市爬頭都算啦，依家連內蒙古鄂爾多斯嘅成長競爭力都好過香港！呢個地方喺邊？唔好問我呀，你問我，我問邊個呀？總之喺好遠好遠好遠啦！畀個咁山旮旯嘅地方跑贏，你話丟架唔丟架？

不過我覺得呢啲咁嘅調查未必可靠，查實香港舊年嘅成長競爭力不知幾好，睇吓喺醫療失誤呢方面已經茁壯成長，拍得住國內嘅無良水平；仲有特區政府官僚嘅冷漠態度，亦有長足進步；而煲呔曾喺益自己友方面嘅成長競爭力，認咗第二，冇人敢認第一啦。

網友觀點...X）...

[　Philip　]

香港競爭力倒退咗好耐啦，係啲官呃自己呃全世界話冇咁嘅事之嘛，仲以為香港係一哥。

[　匿　名　]

香港乜都輸晒啦，依家淨係睇阿公頭，冇啲創意。

[　Wesley Ng　]

上海呀北京呀全部都跑贏晒香港，香港仲可以做啲乜？

[　阿　堯　]

煲呔曾呀煲呔曾，做好你份工啦，搞到香港跌晒Watt，點交代先？

網址：www.sunsiupak.blogspot.com

阿豪觀點：名正言順轉一國一制

新年流流，本來都想講番啲開心嘢，但係大家睇吓今日香港搞成咁，又真係開心唔嚟。呢嗱，最近一項調查顯示，香港雖然喺全國城市裏面，綜合競爭力仍然排名第一，但喺成長競爭力嘅排名就跌到去第十一位。

簡單啲講，即係香港老本充足，仍然總排名第一，但計發展後勁，香港就愈嚟愈差，遲早淪為內地第三流城市，好似話內蒙嘅鄂爾多斯嘅成長競爭力都勁過香港添。

不過話又說回頭，如果香港人以大局為重嘅話，可能變三流城市都好，起碼可以話畀人聽行社會主義嘅內地成功過行資本主義嘅香港，咁五十年不變之後咪可以轉為「一國一制」囉！

網友觀點...X）...

[　奧巴牛　]

競爭力排第一都仲係好好吖，證明我哋已登上高位，上海北京未趕上，所以成長競爭力先高。

[　2009踢走衰運　]

第三流城市？？誇張啲啩，香港未至於咁嘅，不過如果唔諗吓計，真係會畀上海北京取代㗎。

[　melody2010　]

都輸唔晒嘅，香港勝在有好大自由度，係內地冇嘅！

[　我係打工仔　]

愈嚟愈多公司撤出香港，轉移大陸，人工同租都平一大截，而且消費力又高，畀我都揀返大陸啦！香港？遲早玩完。

網址：www.lukchiho.blogspot.com