二○一○年來臨，各式派對搞得好熱鬧，教育局局長孫明揚太太鍾小芬有份創會嘅名太美食會「心連心」，都選擇喺灣仔君悅酒店搞除夕派對，搭正零時一刻，大家一齊舉杯情緒高漲，就連平日一貫表情嚴肅嘅孫公都玩到好high，戴埋紙製紳士帽同孫太大跳土風舞，相當搞笑。孫公同孫太仲祝願港人身體健康，新年進步。
孫太為個會盡心盡力，大前晚漏夜做勞作，剪出「2010」紙牌布置場地，大除夕當日又一早到酒店會場打點，希望一班好友能夠歡度一個愉快晚上。「心連心」成員只有十幾位，但當晚成員大都拖埋家庭成員出席，結果出席者多達幾十人，筵開四席先至夠坐。
參加派對嘅有「精英大師」馬主施雅治同太太Betty、前警務處副處長黃燦光夫婦、藍義方夫人、彭徐美雲同夫婿及兒子、張淦庭夫人、招佩誼、練馬師告東尼同太太Pauline等，當然仲有搞手孫太同丈夫孫公啦！大家開Ball前先嚟一場雀局，之後開飯、唱歌至倒數，盡興一宵。