煲呔曾早幾日喺北京出席一個活動時，忽然測市專家上身，話今年年中本港可能出現雙底衰退，即係經濟復甦後又插水。呢個悲觀言論一出，各界人士都議論紛紛，「造紙大王」李運強對呢個說法有保留，反而擔心政府退市多啲。
李運強喺商場身經百戰，佢間上市公司舊年喺金融海嘯中股價大上大落，對衰退嘅理解非一般人可比，講到煲呔曾預測本港可能雙底衰退時，佢話：「各國退市有專家睇住，邊有咁易出現衰退！」佢仲話，不論中國或美國部署退市都會按部就班，唔會亂嚟，反觀港府推出經濟措施不時搞到進退失據，仲弊。
佢對外國退市措施幾有信心，反而對港府嘅信心就差啲。又係嘅，煲呔曾測市言論準唔準好難講，但佢一陣唱好，一陣唱衰，一時一樣，令人難以適從噃。