元旦賽馬尋日假沙田馬場舉行，立法會議員林大輝拖埋太太為愛駒「極奇妙」打氣。大輝幾度錯失拉頭馬機會，兩年嚟七度贏頭馬都因為撞啱開會或去踢波冇入場，尋日終於打破宿命，可以拉頭馬兼捧走逾六十五萬獎金。
莎莎老闆郭少明都好旺，佢喺第十一場派兩匹馬上陣，結果由「美麗傳奇」奪冠，除穩袋七十九萬幾獎金外，馬會再醒多五十萬作「自購馬首度勝出特別獎」，合共袋近百三萬。
尋日喺馬場仲見富貴黨區議員方國珊（哪吒）同契爺胡楓，佢哋異口同聲話唔識賭錢，入場只為歎茶。哪吒仲話期望今年經濟穩定，少啲政治爭拗，又話會促進政府關心受忽略嘅中產階層，等佢哋可以置業安居。
