民主阿婆獻醜不如藏拙

「忽然民主」嘅民主阿婆成日都不甘寂寞，仲試過騎劫泛民活動，趁七一或元旦遊行現身扮泛民共主、搶風頭已係家常便飯。不過，泛民尋日元旦發起遊行首次去中聯辦請願，由隊頭到隊尾再上番隊頭，都搵唔到民主阿婆嘅蹤影，莫非民主阿婆中途又去咗恤髮？

非也，其實係玩失蹤至真。時移勢易，民主阿婆嘅政治能量所剩無幾，去年七一遊行民主阿婆去到維園現場至發現原來冇人騷佢，只得個前立法會議員單仲偕應酬咗佢一陣，最後乾蒸兩粒鐘後，佢面燶燶咁跟隊尾出發，認真冇癮，今次可能獻醜不如藏拙啩。至於李漢奸，喺黑手飯局一事上同白鴿黨搞到面左左，尋日都唔敢再玩嘢，黐實白鴿黨大隊行，不過，搞事一族得佢現身，足見已經散散哋。

講番個元旦遊行，搞出「好感事件」嘅甘乃威尋日喺遊行前上台做騷，點知畀台下一名年輕男子大聲怒罵，鬧佢令白鴿黨同泛民蒙羞，仲要搞到泛民補選失利喎，呢啲真係叫做自作孽，唔怪得人囉！