城中近排多盛事，「香港醫學會八十九周年除夕晚會」喺前晚舉行，以Global Extravaganza為題，所以大會嘅dress code係環球服裝，立法會議員葉劉淑儀同囡囡葉榮欣一齊出席，葉劉以一身黑色背心及膝連身裙襯歐洲復古襟針打扮，成功入圍打扮突出嘅女士，有份競逐Global Girl殊榮。
佢嘅對手係幾位以中國、蒙古、印度同韓國服飾打扮嘅女士，大會規定，佢哋要行catwalk作最後比併，其他入圍者行得風姿綽約，但做過保安局局長嘅葉劉就出奇招，冇用貓步，改用紀律部隊嘅步操方式嚟演繹自己身上嘅服裝，陽剛味夠晒濃，又充分表現出自信嘅一面，最後贏咗個魅力非凡大獎。
當晚仲有倒數活動，醫學界議員梁家騮連趕三場，喺倒數前半個鐘頭先入場。佢透露自己係「無錶人」，因為做手術成日要洗手，戴錶好唔方便，所以已經好多年冇戴錶，但亦訓練到自己有時間觀念。