本文重點
二○一○年揭開序幕，立法會下禮拜三（六日）就會召開今年第一次會議，首個動議辯論由建仔嘅李慧琼（Starry）提出，佢食住早排消委會公布無良短訊嘅勢，提咗七項加強消費者保障嘅措施，最辣嘅建議係草擬保障消費者嘅法例，並由消委會或者另行成立嘅消費者權益保障專員執法。照家吓嘅安排，消委會升呢執法嘅可能性好細，反而被吞併嘅可能性大啲。啱啱進入新年就被呢股風暴追住，睇嚟消委會主席張炳良同總幹事劉燕卿（Connie）有排煩。
Starry呢個動議辯論內容好詳盡，重點針對電子訊息、會籍、層壓式銷售等不良營商手法，部分建議已經喺一啲行業實行緊，只有另行草擬《消費者權益保障條例》規管不良營商手法，並因應新條例成立一個專責執法機構嘅建議比較特別。
勢被矮化甚至吞併
按照動議嘅構思，政府可以授權消委會執行保障消費者權益嘅法例，亦可以另外成立一個「消費者保障專員」嚟執法，係人都知，依家消委會只係一個調查、研究嘅機構，執法工作由海關、機電署等政府部門做，且商務及經濟發展局又負責唔少同消費者相關嘅範疇工作，政府會授權消委會執法嘅可能性真係好細。
但如另外成立一個專責執法機構，咁消委會又面臨被矮化甚至被吞併嘅威脅。截至尋日為止，立法會已經收到三、四個議員提交修訂案，並且一致支持Starry呢個執法機構嘅建議，換言之，呢個動議辯論幾乎十拿九穩可以通過。民間一直有聲音要求成立保障消費者權益嘅更權威執法機構，喺呢個情況下，張炳良同Connie真係要防範消委會泡沫化，或者變成另一個機構嘅宣傳部門。